My Blog List

Tuesday 13 March 2012

Pu Sian Za Thang Hong Nusiat Na(Lunmual khua) part 7

http://youtu.be/n_nG9LAKmRs

52 views 
   
Uploaded by  on Dec 3, 2011
No description available.
  •  likes, 0 dislikes

HAWAII TUIKULH GAMNUAM TANGTHU TOMNO

Kong it uh Zomi U leh Naau a kua maciat:
     "Hun awng (vacation) koi ah na zangh nuam peen aa?" ci in hong kidongh hi leh Israel gam leh Hawai’i gam ka ut peen nih te sung pan Hawai’i gam ah January 12-19, 2012, va zin thei kahihmanun a pai ngei nai lo te ading iin deihsakna tawh a nop cit zia tawm khat hong hawm sawn ingh.  Hawai’i gam sung, ka hawh ka ciahna uh aa ka lak uh video a en nuam te ading iinhttp://vimeo.com/38372723 ah hong khah khia ingh.

Hawai’i Gam Thu Tomno: Hawai’i ah zinh takpi ka sawm masiah Hawai’i, Honolulu leh Pearl Harbor cih ciang lo buang Hawai'i gam thu bang mah a thei lo ka hi hi.  Kei mah a bang Zomi tampi om ding ihihmanin Hawai’i gam ih cih sung ah tuikulh a lian deuh 8 om aa Hawai'i (aka: Big Island), Maui, Lana'i, Moloka'i, O'ahu, Kaua'i, Ni’ihau leh Kaho’olawe tuikulh te om hi.  Mi kim in ih theih khak Hawai'i te' khuapi Honolulu peen O'ahu tuikulh tung ah om aa Honolulu khua sung ah a minthang mahmah Waikiki beach leh Pearl Harbor te om hi. 

Hawai’i Gam Ah Zinhna: Ka innkuan un Hawai’i ah vacation zangh khawm nuam ka hih uh hang iin naupangte’ sangkah laai tak ahihmanin ko nupa bek ka va zin uh hi. Los Angeles, California pan January 12 ni, 8:50 a.m iin ka pusuak uh aa nai 5 vaal deuh bang ka len khit uh ciang iin Maui tuikulh ka tung uh hi. Tua pan iin ka ding khia kik uh aa nai lang sung khawng ka len khit uh ciang iinO'ahu tuikulh aa Honolulu khua pi ah ni tak 3:27 p.m. pawl iin ci dam iin ka tung uh hi. 

Friday, January 13, 2011, ni iin Pearl Harbor (Pale Seikkan) and City Tour ka pai uh aa gaalpi nihna a bei nading aa US kumpi leh Japan kumpi te in thukimna a bawlna uh phual pi ahi Battleship Missouri ka va hawh masa peen uh hi.  Tembaw tung leh sung teng ka va en kawikawi uh aa thupi iin nasia mahmah hi.  Main deck nuai ah thuap 5 bang om aa main deck tung ah level 5 dong om to laai hi.  Hih Battleship Missouri tawh kisai thupi peen ka sak nih te peen (1) Surrender Deck ah US leh Japan kumpi leh gaalkap makai pi te ii kileptuahna mun ka vapai uh aa a kithukimna uh US copy leh Japan copy te ka va en uh hi. (2) 1991 US-Iraq kidona ah thau lawng tampi tawh a va do khit ciang iin a tawlnga suak ahi hi.  January 6, 1941 iin hih tembaw lamh kipan aa January 29, 1944 ciang iin kizangh ta hi.  Desert Storm, Iraq gaalpi khit, March 31, 1992 ciang iin kitawlnga sak hi.  Vanh a kiguan loh ciang iin ton 45,000 gik aa a dim iin a guan ciang iin ton 58,000 gik hi. 

Tua pan USS Bowfin Submarine Museum (Tuisungluut Tembaw) en iin Park sung teng khawng ah ka vak kawikawi uh hi.  Tua zawh ciang Arizona Memorial en ding iin Navy tembaw tawh ka galkah uh hi.  Japan te in USS Arizona battleship a kap siat uh ciang iin tui sung a tumna mun lian mah ah tu dong om laai aa tua tembaw tum sa tung ah tu aa a kimu thei USS Arizona Memorial a kilam thak ahi hi.  USS Arizona tawh a tum khawm aa a si mi 1,177 te’ min teng kawm tung ah kigelh zihziah hi.  Tui sung ah tum ahihmanin muh nop cih et theih ding muh theih om lo hi.  Ka lungsim hong lawng peen khat ah tua tembaw pi tui sung ah a tum ni December 7, 1941 iin diesel ton 2300 (500,000 gallons) tawh a tum khawm hi aa diesel bung te kekseeu ta ahihmanin tawlnga lo iin tua diesel tui phuul den aa tu zawh kum 30 bang luang laai ding ci uh hi.  Tu maa kum 71 laai aa tembaw sia sung pan a luang den diesel peen tu zawh kum 30 bang luang laai ding cih thu lamdangsa iin ka lungsim hong vut peen hi.  Hi bang iin nuam tak iin kiginni, Friday, ka zangh uh aa January 14, Pasian’ Sabbath ni siangtho, Saturday ni iin nuam tak tawlnga iin Honolulu Central Seventh-day Adventist Church ah ka kikhawm uh hi.

Sunday, January 15, ni masa ni, peen ka suah ni hi aa Hawai’i ah nuam tak aa zat ding ka gelna uh a omsa mah bang iin Makani Kai Helicopters touring company te zangh iin Helicopter tour ka pai uh hi.  Helicopter tung ka tuan masak peen na uh hi aa ka nupa un Honolulu International Airport pan kipan khia iin Pearl Harbor, Honolulu khua sung, khua kim khua paam leh O’ahu tui kulh kimveel iin minute 45 sung bang leeng kawikawi iin Topa’ piansak mual leh guam, lo zau, khuapi, sing kung lopa leh tuipi hoih te ka et uh ciang iin “Topa, Nang na lian hi” ci iin Topa’ liatna ka phat uh hi.  Mual dawn kiil hiam keen mahmah khawng ka muh uh ciang iin ke’n muh nop ka sak mahmah hang iin Maangno bel lau lua kisa iin hong lencip iin mitsi cip zaw sop hi.  Aman photo la iin ken video la ding ka cih uh hinapi photo leh video te kei bek ii lak hong suak pian ahihmanin a muh nop huai tampi ki la kha lo hi.  Vanleeng leh car khawng a kham thei mahmah hinapi Maangno in Helicopter kham het lo bilbel ahihmanin Topa’ thupha lianpi ka saang beh uh hi.
Nitak lam ciang iin Honolulu khuapi nawl, Diamond Head Crater a kici mei mual puakkham kuampi ah vak kawikawi iin a lamdan zia te ka va en kawikawi uh hi.  Tua kuampi peen kham kitaatsa tawh kibang ahihmanin Diamond Head cih min a kiphuah ahi hi.

Monday, January 16, 2012 ni ciang iin Polynesian Cultural Center tour ka pai uh hi. Fiji, Hawai’i, Maori New Zealand (Aotearoa), Marquesas Samoa, Tahiti leh Tonga, cih bang te ii nuntak zia leh ngeina tuamtuamte lahna mun hi aa ni kai khit deuh pawl aa tui tung ah guunkuang pi te tawh cultural show a hong lah uh peen muhnop mahmah hi. Ni tak ciang iin Alii Luau (Kumpi te’ nek bang an) ka nek khit uh ciang iin Cultural Center mah ah “Ha: Breath of Life” show ka en uh hi.

Tuesday, January 17, 2012 ni ciang iin O’ahu tui kulh pan Volcano tour pai ding iin vanleeng Boeing 757 tawh zingsang 7.30 pawl iin ka ding khia uh aa nai lang sung khawng tuang iin Hawai’i island (aka: Big Island) aa Hilo International Airport ka tuk khit uh ciang iin bus tawh volcano tour pai uh hi. A diak diak iin ka hawhna uh ahi Halema’uma’u crater (dumpi) thu tomno hong gen pak nuam ingh. Leitung bup ah mual puak kham a om den peennaKilauea mual dung, Hawai’i (Big Island) ah om aa 2,530’ x 2,951’ (770 x 900 metres) bang kual pempam iin lei maitang pan 270’ bang thuk suk hi.  A thuapthuap iin kual 5 bang iin kia suk hi.  1790 kum maa te in zongh om khin ahihhang iin 1790 kum iin a nasia mahmah khat a puak khap thu kiciamteh masa hi.  1924 kum aa a puak khap man iin lei leh suang tampi lawn khia ahihmanin a kual pi (crater) a zah nih bang iin liat beh aa a taw kawdokh aa buan so pi (lava lake) peen lei mai tang pan 1200’ dong thuk suk sak hi.  1974, 1982 kum te ah zongh a puak khap ban ah hih mun peen tawlnga lo (active) iin ki tokh den aa September 2, 2008 aa a puakkhap hun pan tu laai tak aa 215 ft. bang a thukna mun ah buansa lipi a om den ahi hi.  Tua buansa lipi (lava lake) a ki tokh lualua pan tawlnga lo iin sun leh zan 24/7 iin sulfur dioxide mei khupusuak den hi.  Cidamna ding iin tua huih hoih lo ahihmanin a nai ah kua mah pai sak nawn lo uh hi.  Tua mun kiim, highway dung vei leh tak mun tampi tak ah lei kikhang kham vang pan iin tui sa tui khu te sun leh zann tawlnga lo iin pusuak den aa a nai ah ka va et uh ciang iin sa mahmah hi.   Nitak khua mial dek tak ciang iin Honolulu khua, O’ahu tui kulh ah ka ciah kik uh hi.  Kilauea dung ah Chain of Craters a om hi aa February 24, 2012 ni iin zongh a khang deuh ah mual vang khat pan lava phuul ziah ziah iin guun tui luang bang iin luang keei hi.  A mu ngei nai lo te ading deihsakna tawh mual puak kham om zia theih nading iin video leh lim pawl khat zongh hong guang ungh.  

Wednesday, January 18, 2012 ni iin Honolulu khuapi sung teng ah ka vak kawikawi khit uh ciang iin Pacific tuipi sung aa O’ahu tuikulh ii Honolulu khuapi sung aa Waikiki beach ah ni tak lam hun khempeuh nuam tak iin ka zangh uh hi. 

Thursday, January 19, 2012 ni ciang iin a masa peen Submarine tour (tuipi sung lut aa etna) ah ka ziing pai uh hi.  9.30 a.m. pan 11.30 a.m. dong Submarine tour ka pai uh aa mihing’ bawl setpi sung ah tuang iin tuipi nuai 100 ft. vaal bang lut suk iin Pasian bawlsa tui sung ganhing te leh tuipi nuai leitaw te ka va en uh hi.  Nitak 1.40 p.m. pawl iin Honululu pan Los Angeles lam zuan iin ka ciah kik uh hi. 

Thukhupna: Grand Canyon of the Pacific a kici mile 10 bang a sau Canyon om hi.  Mei mual puak kham te, mei mual dumpi te, acre za tampi huam aa buansa keu suang suak (lava stone), lava tube (buansa luanna kawhawm), cih bang te et ding tam mahmah hi.  Sa lo vot lo iin Kawl gam, Asia gam lam tawh sing kung lopa te a kibangh tam mahmah aa mual leh guam te zongh hing dikdek iin a om kawmkaal mah ah seh nel gam bang iin sing kung lopa te a po zawh lohna kolh leh sehnel gam dan zongh om hi.  Yangon, Bangkok, Calcutta, Bombay, Singapore khua te mah bang iin nupi, papi, teek sia dong in bus mah zangh zaw uh hi.  US gam sung ah lam dung zui iin khe tawh kivak khol lo ahihhangin zankim or ziing sang nai 1,2,3,4 cih te dong iin Honolulu khuapi sung ah numei pasal sun tha pai, zan thapai iin khe tawh ki leh suk ki leh to iin vak ngeingai mai uh hi. 

Khantohna leh nek leh dawn te ah US gam sung bang lian hi.  Hawai’i khua hun nuam mahmah aa kum khat sung tawntung khua hun kibang den hi. Tourist zongh kum sim iin million 7 bang a pai den ahihmanin nek leh dawn peen mantam mahmah aa lothaang san te bang $2.00/lb vaal hi aa manager special te nangawn $1.60/lb bang man laai mawk hi.  Riverside, California bang ah $1.00 tawh 6 to 10 lbs ka ngah hun uh tam thei ahihmanin ka et kakk ciang iin California peen tenna ding mun hoih khat ahih lam ka phawk kik san hi.

Hun ngah aa a zin kawikawi zo ding Zomi te in khat vei peuhmah Hawai’i ah na zin hamtang ding uh hong deih sak ingh. Sum tampi a bei hang iin khat vei peuh mah pai huai ka sa hi.  Hi zah at phot ning. 

Maangno & Mungno Gualnam
Riverside, California
March 12, 2012

Behlapna:
Hih Hawaii Tuikulh Gamnuam Tangthu Tomno hong hawmsawn Sanggamte geel tung ah Lungdam mahmah hi.
Hawaii, adiak in Honululu aa om Sanggamte sung pan meeltheih zong om saam aa,... adiak in a Innteek mahmah ta Sanggampa TK.Piang(Lianpipa) bang muanhuai mahmah in um ing. Ahizong Contact ngah-nailo saam ih hih man bek hin aman zong hong gelhbeh lai leh ut huai sam ei maw,...  
Hornbillsnet Group International